Entradas etiquetadas como ‘Día das Letras Galegas’

Fomento de la lectura desde el blog en el mes de las letras

miércoles, abril 6th, 2016

El cuarto centenario de la muerte de Cervantes y Shakespeare nos lleva esta semana a una función esencial de la docencia en todos los niveles y materias: el fomento de la lectura. En el mes de la letras se propone utilizar el blog como dinamizador de la lectura dentro y fuera del aula.

Un primer paso puede darse hoy mismo con la lectura del artículo de Juan José Lage en La Voz de la Escuela de hoy, que desgrana una serie de claves para conseguirlo: motivación, narración, formación, ilusión, no imposición y libertad.

Un segundo paso podría encontrarse en la estrategia para convertir el blog en un elemento dinamizador de la lectura, tanto en el aula (blog de aula) como en el centro (blog de la biblioteca escolar).

En el blog del aula proponemos crear una sección o categoría, en la que se concentrarán y archivarán las publicaciones que ayuden a dinamizar la lectura. Ahí pueden estar los recursos aportados por el docente, pero también los productos de la lectura del alumnado participante. Un lugar de referencia para el alumnado y sus familias, haciendo que la lectura salga de las paredes del aula y llegue a cada uno de sus hogares.

Para el blog de la biblioteca, se puede ir creando durante este mes y el siguiente, en el que se conmemora el Día das Letras Galegas, una sección centrada en las celebraciones: Manuel María y Cervantes, pero también Shakespeare en lengua inglesa y cualquier otro autor en las lenguas que se enseñen en el centro.

Una serie de actividades y propuestas lectoras que encontrarán, sin duda, el éxito entre el alumnado si ambos, docentes y alumnos, están motivados para llevarlas a cabo y si se siguen líneas de actuación como las propuestas hoy por Juan José Lage. Sobre todo aquellas que llevan a la libertad y a la no imposición que tan bien sintetizó Antonio Muñoz Molina en 1998:

“La literatura no es aquel catálogo abrumador y soporífero de fechas y nombres con que nos laceraba mi profesor de sexto, sino un tesoro infinito de sensaciones, de experiencias y de vidas.”

Homenaxe a Xosé Filgueira Valverde no Día das Letras Galegas 2015

viernes, mayo 15th, 2015

 Xosé Filgueira Valverde (Pontevedra 1906-1996), licenciado en dereito, filólogo, especialista en literatura galega medieval e activo galeguista desde os anos vinte ata a súa morte, é a figura homenaxeada este ano o 17 de maio. Un polígrafo cunha extensa obra ensaística, entre a cal se atopan múltiples artigos en La Voz de Galicia, que hoxe se ofrecen en escolma co xornal, tamén probou sorte no eido da creación literaria con pequenas obras dramáticas é poesía. 

Un achegamento á súa figura e á súa obra pode facerse partindo da sexta páxina de La Voz de la Escuela:

Proponse tamén o documental “Contextualizando a Filgueira Valverde” de Gonzalo É. Veloso:

embedded by Embedded Video

YouTube Direkt

Bo e proveitoso Día das Letras 2015!

Balance da semana das Letras Galegas no blog

viernes, mayo 16th, 2014

Hoxe venres propoñemos unha actividade que busca extender esta semana das Letras Galegas máis aló do día de mañá sábado, dedicado á figura de Xosé María Díaz Castro, o autor de “Nimbos“.

O seu municipio natal, Guitiriz, homenaxeará o escritor co acto central deste día e no que participarán, entre outros, os fillos do autor, o presidente da Xunta e diversos escritores e artistas, entre os que se pode salientar ao Director da Real Academia Galega, Xesús Alonso Montero, ós poetas e académicos Xosé Luís Regueira, Darío Xoán Cabana e Xosé Luís Franco Grande, á cantante María do Ceo ou aos poetas Luis Tosar e Luz Pozo.

Igual que ocorrerá mañá na vila chairega, propoñémosvos hoxe que fagades balance das celebracións realizadas no voso centro durante esta semana e de próximas actividades que se vaian realizar arredor da figura do poeta Díaz Castro ou de calquera outro evento levado a cabo dentro ou fóra da escola arredor da lingua ou da literatura galegas.

Feliz Día das Letras Galegas 2014!

 

Iníciase a semana das Letras Galegas 2014

lunes, mayo 12th, 2014

Este ano a celebración semanal das nosas letras esténdese ata o sábado 17, Día das Letras Galegas, que este ano está dedicado a Xosé María Díaz Castro, autor do poemario Nimbos e do que  a continuación ofrecemos un dos seus metros máis coñecidos, Penélope, musicado e cantado por Mini e Mero, do grupo A Quenlla:

Unha versión que se pode completar co traballo videográfico sobre o poema, realizado polo alumnado do IES As Barxas de Moaña (Pontevedra):

Para completar esta introdución á figura de Díaz Castro propoñemos, unha vez máis, o magnífico Telexornal conmemorativo realizado polo alumnado do CPI dos Dices de Rois (A Coruña), que este ano se realizou en directo e en “streaming” desde a Cidade da Cultura:

Por último, e para rematar, recomendamos a completa páxina da Secretaría Xeral de Política Lingüística sobre o homenaxeado neste Día das Letras Galegas 2014:

 

Con estes materiais como punto de partida propoñémosvos que iniciedes hoxe mesmo un proxecto centrado na figura do poeta botando man de todas as informacións que atopedes na prensa e nos medios de comunicación para colgar durante e ao remate no blog os resultados do voso traballo.

Boa e proveitosa semana das Letras Galegas!

Roberto Vidal Bolaño máis aló do Día das Letras Galegas

jueves, mayo 16th, 2013

Roberto Vidal Bolaño é o primeiro dramaturgo homenaxeado no Día das Letras Galegas. Esto significa que o medio de expresión artística que elexiu o autor santiagués vai máis aló das páxinas das súas obras en papel. O teatro é , desde os seus inicios, unha representación, un espello da vida. Esta mímese require dun espazo escénico que, no día antes da conmemoración oficial, propoñemos como proxecto para levar máis aló do texto escrito ou da imaxe estática a mensaxe artística de Vidal Bolaño.

A vía que posiblemente escollería o propio Roberto se tivera ante si a posibilidade de levalo a cabo nunha aula ou nunha escola, sería poñer en danza a todo o alumnado disposto a seguilo nunha aventura teatral. Ben cun texto propio ou composto en colaboración polo alumnado, o mellor xeito de facerlle unha homenaxe a un home de teatro como el sería sentir en carne propia, cada un dos alumnos e alumnas da aula e adaptándose ás habilidades e gustos de cadaquén, o proceso de creación dunha proposta escénica.

Un paso máis aló sería imaxinar a Roberto na actualidade e, posto no seu lugar, ir creando unha obra propia que tratara temas como a indignación do 15M e da maioría da poboación dos países do sur de Europa; a corrupción política e social; o insólito roubo do Códice Calixtino e das esmolas da Catedral de Santiago a mans dun electricista metódico á maneira dun dos tipos teatrais de Molière; o modelo económico e político da sociedade tanto galega como española, europea ou mundial; as novas dinámicas de comunicación e interrelación que os medios tecnolóxicos están creando… Sobre todo, cando un dos obxectivos principais é desenvolver competencias básicas como o espíritu crítico e a autonomía persoal.

Se o alumnado está na franxa máis baixa de idade, Vidal Bolaño ten tamén textos para os máis pequenos como Touporroutou da lúa e do sol, Ruada das papas e do unto ou Xáxara, Peituda, Paniogas, Tarelo, o Rapaz e o Cachamón, ou como trocar en rato pequecho o meirande xigantón. Proxectos que poden servir de modelo para propostas de creación de títeres, máscaras e monecos, acompañados de música e ritmos creados polos propios nenos e nenas. Unha posta en escena do alumnado de primaria e incluso de infantil pode converterse na máis fermosa homenaxe a Roberto Vidal Bolaño partindo desta primeira celebración no Día das Letras Galegas da obra dun autor teatral cunha produción extensa e moi orixinal.

Feliz Día das Letras Galegas a todo o mundo e moita sorte e ánimo nos vosos proxectos teatrais! Non vos esquezades de deixar constancia de todo o proceso no voso blog, espazo propicio para o traballo compartido, para converterse en caderno escénico e en escaparate de documentos como o texto teatral creado e, incluso, o making of de todo o proxecto ou unha gravación da representación o día da súa estrea.

Deixámosvos hoxe coa homenaxe realizada a Vidal Bolaño no número do mércores 15 de maio en La Voz de la Escuela e que inclúe propostas (páxina 2) como o concurso de EducaBarrié “Agasallo de luz”, no que se propón ao alumnado a elaboración e posta en escena dun texto teatral mediante unha webquest:

Día das Letras Galegas 2013. La Voz de la Escuela. 15.05.2013

Roberto Vidal Bolaño nos vosos blogs durante a semana das Letras Galegas

lunes, mayo 13th, 2013

O proxecto de traballo cos vosos blogs esta semana circulará, posiblemente, arredor da figura do dramaturgo santiagués Roberto Vidal Bolaño (1950-2002), autor homenxeado este ano no Día das Letras Galegas.

Por iso o post de hoxe non é só un trampolín, unha lanzadeira que se propón axudar a botar a andar o voso proxecto de traballo co blog na aula, senón tamén un escaparate do estupendo traballo que se está a facer nos nosos centros educativos. Esta vez traeremos a estas páxinas dixitais unha mostra de productos do traballo por proxectos de varios centros con vocación de ir un pouco máis alá, de desenvolver verdadeiramente a creatividade e as múltiples competencias do alumnado, de ir directamente ás fontes da información partindo dun interés polo entorno máis próximo e de investigar máis a fondo mediante o traballo cooperativo.  Esta colaboración é a que, por quinto ano consecutivo, trae a este espazo o cada vez máis perfeccionado Telexornal do Día das Letras Galegas, realizado polo equipo de traballo do CPI dos Dices, de Rois (A Coruña):

Un traballo que este ano tamén se complementa cun estupendo documental sobre a obra do homenaxeado:

Outro exemplo de traballo cooperativo, pero esta vez realizado por equipos de profesorado, é o que teñen colgado na web os integrantes do Seminario Galán, procedentes de 13 centros da provincia da Coruña:

Unha última mostra, coa que pechamos hoxe, témola no traballo do equipo do IES Concepción Arenal de Ferrol:

Sexa como fora o voso camiño de investigación e a selección que atopedes máis axeitada para colgar o(s) produto(s) do voso traballo, o blog é o espazo ideal para facelo.

Unha boa semana das Letras Galegas a todo o mundo!

50 anos das Letras Galegas

viernes, mayo 18th, 2012

Este ano cúmprese o 50 aniversario do Día das Letras Galegas, unha conmemoración iniciada en 1963 pola Real Academia Galega e que aquel ano homenaxeou a figura de Rosalía de Castro cen anos despois da publicación do seu poemario Cantares gallegos (1863).

Con este motivo, a Real Academia Galega ven de iniciar unha campaña conmenorativa da que ofrecemos aquí as primeiras 20 biografías dos homenaxeados nestes 50 anos de Letras Galegas e que axiña estará accesible en formato completo na web da Academia:
Todas as letras do día das letras.RAG

A xeito de peche desta semana de celebración propoñemos partir da lectura da breve biografía dunha das persoas homenaxeadas a elixir libremente por cada un dos alumnos e alumnas para despois faceren una breve entrada no blog centrada na súa figura. O alumnado pode crear un póster multimedia con Glogster, seguir o modelo dos carteis conmemorativos de cada un dos homenaxeados presentados na web da Academia ou calquera outro proxecto literario, visual ou adiovisual que se lles poida ocurrir. No proceso, farían unha pescuda sobre a figura elixida, leerían fragmentos da súa obra e crearían unha entrada orixinal que os achegara máis a esa figura que verdadeiramente os motiva. Deste xeito, o Día das Letras Galegas traspasaría os límites desas 24 horas festivas ou da semana das letras que remata hoxe. Onte iniciouse o ano de Valentín Paz-Andrade, pero tamén se celebran eses 50 anos e 50 figuras relevantes da cultura galega cunha obra e unha vida que podemos ir revisitando durante os próximos 365 días. Outro espazo para iniciar este camiño cara o pasado, pero tamén cara o futuro son as páxinas adicadas ás Letras Galegas en La Voz de la Escuela do pasado mércores:
A Festa Das Letras Galegas.la Voz de La Escuela 16.05.2012

Valentín Paz-Andrade: A semana das Letras Galegas no blog

miércoles, mayo 16th, 2012

Comeza a semana das Letras Galegas que este ano conmemora a figura de Valentín Paz-Andrade. Este avogado, escritor, xornalista e empresario pontevedrés forma parte da xeración que protagonizou a loita pola autonomía desde o Partido Galeguista durante a II República e que loitou en moitos frentes pola defensa da lingua e a cultura galega durante a dictadura franquista e ata a súa morte en 1987. Pero para coñecer a súa vida máis polo miúdo, boto man do estupendo Telexornal Paz-Andrade, realizado por alumnado da ESO do CPI dos Dices de Rois (A Coruña), un proxecto audiovisual multidisciplinar que conta xa con tres anos de vida adicado ás figuras homenaxeadas o Día das Letras Galegas:

embedded by Embedded Video

YouTube Direkt

Este produto final dun proxecto de xornalismo de investigación serve como modelo dun traballo de precisión en busca de testemuñas relevantes sobre a figura de Paz-Andrade. Por suposto, tanto o produto final como o proceso contan cunha serie de materiais en bruto que poderían converterse no eixo descritivo dun blog como caderno de bitácora do proceso de investigación. En primeiro lugar, as entradas e comentarios poderíanse converter nun espazo de intercambio de información e debate. A continuación, nun lugar de creación dos cuestionarios para realizar as entrevistas mediante propostas de preguntas e selección e organización das mellores. En terceiro lugar, nun espazo onde colgar os vídeos en bruto para compartilos e deixar evidencia dos pasos que van dun traballo sen pulir a outros produtos que poden saír do mesmo proxecto como o titulado Paz-Andrade, supervivente:

embedded by Embedded Video

YouTube Direkt

Ou o documental que leva por título Valentín Paz Andrade. Compromiso con Galicia, realizado dentro do mesmo proxecto:

embedded by Embedded Video

YouTube Direkt

Por non falar de converter o blog nun espazo de encontro, de intercambio, de traballo interdisciplinar no que o alumnado aprende facendo, desenvolvendo as súas competencias dun xeito motivador que tamén inclúe ao resto da comunidade, intra e extramuros. Para finalizar, queremos felicitar ao profesorado e ao alumnado do CPI dos Dices de Rois polo seu esforzo valioso neste e nos anteriores días das Letras Galegas. E volvendo a vista atrás un ano, propoñémoslle aos seguidores do Blogmaestro unha adiviña: Quen son dúas das rapazas que aparecen noutro dos traballos da videoteca particular deste centro coruñés no que se fai unha homenaxe a Lois Pereiro no multiusos de Rois?

embedded by Embedded Video

YouTube Direkt

Feliz e proveitosa semana e Día das Letras Galegas 2012 a todo o mundo.